لا لغلق الميدان – م/ محمود فوزي

الثلاثاء، 12 يوليو، 2011



لا لغلق الميدان – م/ محمود فوزي
http://egyptandworld.blogspot.com/2011/07/blog-post_12.html

اراد احد الابناء حقا له عند والده فاحتجز اخيه وامه في حجره وهدد بقتلهم واحراق البيت اذا لم يتم الاستجابه له

هذا شبيها بما يحدث في التحرير وبعض المناطق الاخرى حيث لا أرى سببا واحدا لغلق ميدان التحرير أمام السيارات وغلق مجمع التحرير رغم ان اثار هذا عكسيه ولا يدرك المعتصمون أنهم يثيرون الشعب ضد قضايا الثوره حيث انه تعطيل لصالح البلد بلا داع

اذا اراد البعض الاعتصام (والبعض هنا بضع مئات) فيجب عليه الالتزام باحترام الناس وحقهم فى المرور بالميدان لقضاء مصالحهم بالاضافه الى انه يجب عدم التفكير مطلقا فى تعطيل مصالح الناس لانه لا يجب ان تطالب بحقوق بينما تتسبب في أضرار للناس والبلد نفسها

الافكار المتهوره في غلق الميدان والمجمع تشجع اخرين على افكار أكثر تهورا فرأينا اغلاق طريق السويس – البحر الاحمر بالاضافه الى بعض اخر اعلن انه يريد تعطيل الملاحه في قناه السويس

رغم ان الفكره الاخيره غير عمليه ومن غير المتوقع – باذن الله – القدره على غلقه ولكن مجرد اعلان ذلك في الاعلام فانه يضر بمصالح البلاد نفسها وهذا غريب اذا كنا نريد كلنا مصلحه مصر

هناك الكثير من افراد الشعب بدا يتململ مما يحدث وهو ما يثير تحذيرا مهما يجب الانتباه اليه وهو انه يجب ان لا نسمح بوجود فجوه بين الشعب و مطالب الثوره

وقبل ان يتهمني البعض بأنى خائن وعميل فاننى بالطبع مع مطالب القصاص ولكن في نفس الوقت يجب ان لا تحدث هذه المطالب اثارا سلبيه على البلد نفسها

ذهبت الى التحرير لمناقشه المعتصمين ولكن ماحدث اننى رايت ان الكثير منهم لا يعلمون جيدا مطالبهم بشكل محدد كما انه عندما لا يعرف الرد على افكارى فانه يطلق الاتهام النمطي بالخيانه والعماله

كما انه هناك افكارا غريبه من عمل مجلس رئاسي وحكومه من الميدان وهى افكار كنا قد انتهينا منها في الاستفتاء الدستورى ويجب ان لا تطرح مره اخرى اذا كنا نحترم الشعب

من الامور العجيبه انهم اغلقوا مجمع التحرير بالقوه ثم قالوا انه عصيان مدني ولا ادرى من أفهمهم هذه المصطلحات فالعصيان المدني في هذه الحاله هو ان يمتنع الموظفون انفسهم عن العمل تماما وليس ان يتم منعهم بالقوه

هم قالوا انه سيتكرموا على الناس بفتح المجمع 12-7 وحتى الخميس 14 -7 واذا لم يرضوا بما يحدث من قرارات الوزاره فانه سيعيدوا غلقه وهذه كارثه كبيره

وللاسف هذه سابقه يجب أن لا تمر بسهوله لانه بنفس المنطق يمكن لمجموعه (اسفين ياريس) باغلاق شارع جامعه الدول العربيه فى اعتصام هناك
وبالتالى سيكون المطلوب منا ان نتركهم كما تركنا بضع المئات يفعلون المثل فى التحرير

بالاضافه الى عمليه قطع الطرق أدت بالفعل الى الاثر العكسي حيث قام بعض البلطجيه بقطع طريق القاهره – اسيوط الزراعي منذ حوالى 3 أسابيع واوقفوا السيارات واستولوا على ما فيها بالاكراه حتى اتت قوات الجيش وانهت المهزله

يمكن تكوين وفد من القوى السياسيه المختلفه وايصال الرسائل للمجلس العسكري والحكومه وحتى اذا افترضنا الاضطرار لعمل مليونيه فانه يكون في يوم الجمعه فقط والتاكيد على عدم الاعتصام واعتقد ان هذا هو راى الاغلبيه بدليل امتلاء الميدان يوم الجمعه بينما فى الاعتصام كان هناك بضع مئات

المرحله الحاليه بها ايجابيات وسلبيات ولكن لزياده الايجابيات وتقليل السلبيات يجب ان ننظر الى الفعل واثاره الجانبيه فالبلد بلدنا وليست تخص اخرين

بالاضافه الى اننا يجب ان نسرع الى بدء انشاء مؤسسات الحكم مجلس شعب منتخب ورئيس منتخب حتى يبدأ الشعب في بناء الدوله ويراقب (بالزام) اى حكومه موجوده الا اذا كان البعض لا يثق فى رؤيه الشعب ويعتبره قاصرا وللاسف هذا رأى البعض فى وسط النخبه.
..............................

6 التعليقات:

غير معرف يقول...

ياعم محمود فوزي انت مسكت القلم وقعدت تكتب ماحدش قالك حاجه اما علشان مناقشة المواضيع بطريقة القعده على القهوه فده عيب انت راجل مهندس وعيب لما اضلل الناس وتقول بعض المئات والناس كلها شايفه مئات الألوف على التلفزيون يعني كأنك مصمم تقول للناس انتم عميان وانا بس اللي مفتح , بجد كده عيب
وبعدين مصالح ايه اللي بتتكلم عنها وقطع طرق كأنك بتصور شباب الثوره شوية بلطجيه وقطاع طرق , اتقي ربنا يعني كان عاجبك طريقة حسني مبارك وحاشيته في تسيير امور ومصالح الشعب ,لازم علشان البلد يرجعلها حقها وترجع للنظام لازم يتم بتر كل العناصر الفاسده وبعدها مصالح الشعب هتسير للأفضل , وبلاش موضوع انصاف الحلول اللي هتفتح ثغرات لعودة الظلم واتباع النظام البائد لسدة الحكم ويتحموا من جديد في مصير وتاريخ بلد زي مصر

norahaty يقول...

بطئ العدالة
وبطئ اتخاذ القرارات
وكثرة النقد والتحليلات
خلت الناس كلها مش
عارفة ايه الصح وايه الغلط:(
وكمان الناس بقت مستعدة
تعمل اى حاجة لتحقيق طلبها

م/ احمد الشهاوى يقول...

المهندس / محمد فوزى
السلام عليكم و رحمة الله و بركاته
لى ملاحظات معينة برجاء قرائتها و الرد عليها اذا كان ممكن
1-هل تعتقد ان عدم الاستجابة لمطالب الثورة من قبل من يحكم شئ مقصود ام هى اخطاء ام لها اسباب غير معلنة
2- هل الموجود الان بالتحرير هم ثوار اصلا ام ان هناك مخطط موجود و يتم تنفيذه بتدمير الثورة من الداخل
3- مصدر نجاح ثورة 25 يناير كان هو التواجد بميدان التحرير اما الان فهناك صراع بين ناس عليت جدا سقف مطالبهم و بين ناس تعبت من طول مدة الفوضى
و شكرا

م/محمود فوزى يقول...

غير معرف

معلش انا باكتب من الواقع اللى انت مش عايز تشوفه وكمان دي اراء الناس العاديه المفروض هم الشعب اللى احنا منه

اما موضوع العدد فانا بالفعل رحت هناك بنفسي وشفتهم وناس كتير من اللى هناك يا اما بيتفرجوا او بينقلوا لقنوات اخباريه ودول نسبه مش قليله من بضع مئات اللى مازلت مصر عليها

انت اتفرج حتى على اى قناه بتنقل من هناك وشوف العدد
المره الوحيده اللى زاد فيها العدد كان الثلاثاء بالليل وكان وصل لبضع الاف

اما بالنسبه لقطع الطرق فانا قلت وقائع بالفعل حصلت واضرت بالناس

اما عن نظام مبارك فانا احب اعرفك انه خلاص مبارك مشي من الحكم

اما موضوع انصاف الحلول فالمفروض ندرس كويس ايه اللى نفروض نعمله بغض النظر عن انه حل او نصف حل
كفايه باه اللى كان بيعمله مبارك من انه بيعمل اللى بيجي فى دماغه

كمان بقى الاهم من ده المفروض ان الناس هى اللى تختار ايه اللى يتعمل فى البلد وده عن طريق انتخابات نزيهه تجيب مجلس شعب ورئيس وبكده نحقق حريه الراى اللى دافعنا عنها واسقطنا مبارك عشانه

اتمنى تكون افكارى وصلت ايها الغير معرف
ربنا يكرمك ويوفقك

م/محمود فوزى يقول...

دكتوره نور

البطء موجود ماشي
لكن مش ممكن يكون البطء افضل من التهور
كمان اللى باظ فى 30 سنه لاينصلح فى 6 شهور

كمان اى سلبيات ممكن تكون موجوده مينفعش الحل اننا نخرب البلد او نأجل الديوقراطيه وهو ده حل اى حاجه بيشتكي منها البعض ده لو كان هو ده السبب الرئيسي
ربنا يصلح الاحوال
ربنا يكرمك ويوفقك

م/محمود فوزى يقول...

م/ احمد الشهاوى
وعليكم السلام ورحمة الله وبركاته

مش كل اللى بيقولوه فى التحرير هى مطالب الثوره لان فيها حاجات كتير مطالب فئويه خاصه ببعض الافراد والتجمعات وكان خلصنا منها فى الاستفتاء الدستورى زي المجلس الرئاسي وتاجيل الانتخابات

اى تباطؤ فى اى شيء فانا شايفه نتيجه دراسات زياده وانهم ملهوش خبره سياسيه من قبل ولكن اى بطء اكيد احسن بكتير من تهور يضيع البلد

الثوار هم كل شعب مصر وبالتالى مينفعش نخص الثوره فى حد معين
اللى موجودين فى التحرير لايعبروا عن نسبه كبيره من المصريين بدليل ان عددهم قليل بالفعل
وبالتالى فان قرار الاعتصام هو قرار فردي بالاضافه الى ان اللى بيحصل من تعطيل احوال البلد ده خطر

مصدر نجاح الثوره توفيق ربنا فى الاساس - ثم بعدييييييين التفاف الشعب كله مش التحرير بس ولكن كل ميادين مصر
الموضوع مش سقف مطالبهم ولكن ده مش سقف مطالب دي حاجات ضد راى الشعب زي المجلس الرئاسي ده مثلا

لازم برضه لا نضغط على الناس اكتر من كده
كمان لازم نشجع الاستقرار شويه فى البلد بدل ما يجيي وقت نضطر فيه لقبول ديون مشروطه من الخارج
لازم نبص لقدام
ربنا يستر
ربنا يكرمك ويوفقك

Blog Archive