تعليق على البيان العسكري الثاني عن عمليه الكمين

السبت، 15 أكتوبر 2016

تعليق على البيان العسكري الثاني عن عمليه الكمين

المتحدث العسكري طلع بيان تاني بيقول فيه انه واصل عمليه مطاره المسلحين اللى هاجموا الكمين
وبمساعده اهل سيناء عرف اماكن التجمع للمسلحين فقام بعمليه قصف لمده 3 ساعات ضرب مراكزهم ودمر 7 عربات دفع رباعي وقتل عدد من المسلحين (لم يذكر عددهم)
والعمليه متواصله
-ده ملخص البيان اللى ناشر النص بتاعه وفيديو فيه اجزاء من القصف
-دلوقتى في البيان الاول قال انه قتل 15 مسلح واصاب العديد ودلوقتى بيقول انه قعد 3 ساعات بيقصف الباقيين
بالتالى هم المسلحين اللى هاجموا الكمين كانوا كام واحد وكام عربيه
وازاي كانوا بيمشوا مع بعض كده ومفيش حد عرفهم من الجيش رغم ان المنطقه كلها فيها تواجد عسكري كبير جدا
طيب فين المخابرات تعرف ان القوه الكبيره المسلحه دي بتتحرك فننقذ الجنود قبل ما يموتوا
- ليه القصف 3 ساعات متواصله؟
اذا كان عنده معلومات بتواجد مسلحين في مكان معين المفروض يهاجم البيوت دي ويعتقلهم
فبالتالى يعرف على الاقل معلومات منهم عن باقى التنظيم انما كده هيعرف منين اذا كان قتلهم حسب كلامه؟
(هو فيه نقطه تانيه انه المفروض يقدم للمحاكمه اى شخص متهم مش يتقتل على طول لانه المفروض برضه اننا فى دوله مش شغل عصابات وقصف داخل بيوت ده معناه ناس كتير ابرياء هيموتوا بس طبعا فيه ناس كتيره مش هتدرك الكلام ده)
-  القصف المتواصل ده بيكون فى حالات عدم السيطره على الارض
وعشان تتأكد شوف الصهاينه لما تعوز تقتل حد فى الضفه الغربيه او في قطاع غزه
في غزه بتقصف بالطيران لانها مش موجوده وملهاش سيطره على الارض
انما فى الضفه فبتروح قوات لبيوت الناس اللى بتشتبه فيهم وتبدا عمليات الضرب او الاعتقال
انا هنا ضربت مثال للصهاينه لانهم بيتعاملوا مع الفلسطينيين كأعداء وميفرش معاهم انهم يقتلوا اى عدد منهم سواء كانوا قاموا بعمليات او لأ
انما المفروض هنا انه المفروض ان الطرفين من نفس البلد
-من فيديو القصف ان فيه بيوت انضربت والبيوت دي فيها ناس
مين قال ان كل اللى في البيوت دي مسلحين؟
اهالى سيناء بيتقتلوا ببلاش و ده بيعمل حاله غضب عارم فيهم
احنا بنخسر الناس دي اللى كانوا من اهم العناصر فى حرب اكتوبر
-نقول تاني العدد متقارب بين اللى اتقتلوا فى الهجوم على الكمين من المجندين وبين المسلحين
مما يدل على فشل تدريبي رهيب
-المفروض بعد العمليات المتكرره دي اللى بيروح فيها المجندين تتم عمليه مراجعه شامله لاسلوب اداره الموضوع ومحاسبه المسئولين عنها ومحاكمتهم محاكمه عسكريه (لانهم عسكريين) بتهم أقلها الاهمال الجسيم الذي أدى لمقتل الجنود
-لكن ده محصلش فى التلات سنين اللى فاتت لانهم مش شايفين ان المجندين لهم اي اهميه
-لكن من الواضح ان اللى بيحصل هجوم من مسلحين على قوات الجيش فيقوم الطيران يقصف اجزاء من سيناء فيموت الكثير من اهالى سيناء او على الاقل عايشين تحت القصف
ومحدش هيتحاسب من المسئولين
المصادر
البيان الاول للمتحدث العسكري
البيان الثاني مكتوب من صفحه المتحدث العسكري
الفيديو من صفحه المتحدث العسكري
الفيديو من موقع وزاره الدفاع على يوتيوب

.............

0 التعليقات:

Blog Archive